UCI World Series

O crecemento do Gran Fondo Ézaro foi exponencial. A boa acollida do público en xeral ano tras ano (tanto participantes como familiares ou afeccionados), ademais dunha cada vez maior implicación dos entes públicos e privados que colaboran coa proba, permítenos ofrecer unha maior cobertura a todos os niveis, facendo do evento en si un gran espectáculo, o maior de Galicia no ámbito do ciclismo.

Consecuentemente, a repercusión mediática deste evento faise patente ano tras ano, con reportaxes en cadeas de televisión e o establecemento de paralelismos coas grandes probas, como a Volta a España, que este ano recalará de novo en Ezaro.

Ademais, son moitos os ciclistas históricos que se puxeron o dorsal para gozar polas estradas da Costa da Morte. Lendas como Miguel Indurain ou Claudio Chiapucci, que repetiron en dúas ocasións, Alex Zülle, Tony Rominguer, Pavel Tonkov, Joseba Beloki, Ángel Casero, Iván Raña, Óscar Pereiro ou o pentacampeón do mundo Javier Gómez Noya formaron parte xa deste pelotón

Todo este gran evento conta, ademais, desde a súa edición 2018, co aval internacional da UCI Gran Fondo World Series. En 2020 será a terceira ocasión no que O Gran Fondo Ézaro formará parte deste selecto grupo de carreiras que, a nivel internacional, puntúan para os campionatos do mundo desta disciplina e que rolda a vintena en todo o mundo. Ademais, é a única proba en España con esta cualificación, o que constitúe unha oportunidade única para os nosos participantes.

Scroll to Top