Concellos
Concello de Dumbría
Sen dúbida, o maior apoio co que conta o Gran Fondo Ézaro para levar a cabo a proba. Dumbría é unha pequena localidade da Costa da Morte que conta con preto de 3.000 habitantes. Dunha beleza paisaxística excepcional, a Fervenza do río Xallas ou o Miradoiro do Ézaro son dous reclamos turísticos que atraen a miles de persoas cada ano.
Concello de Cee
Duns 7.000 habitantes, o pelotón bordeará este concello para, tras un pronunciado descenso, enfilar a última ascensión antes de chegar a pé de porto en O Ézaro.
Concello de Muxía
Unha localidade infestada de historia, o Santuario da Virxe da Barca, o Cabo Touriñán ou a praia de Lourido son tres puntos de interese que sen dúbida farán máis inesquecible a túa visita á Costa da Morte.
Concello de Vimianzo
Rico en elementos arqueolóxicos do megalitismo, destaca como un dos lugares con maior concentración de dolmens e túmulos en toda Galicia. Ademais, no seu territorio pódense observar algúns dos máis singulares e característicos, como Pedra Cuberta onde Georg Leisner localizou as primeiras pinturas rupestres nun dolmen do noroeste peninsular. Un roteiro turístico desenvólvese por todo o territorio municipal para poder visitar diferentes monumentos prehistóricos.
Concello de Mazaricos
Eminentemente gandeiro, o de Mazaricos é un concello que destaca por posuír uns espazos naturais por explorar e unha infraestrutura para o turismo rural en crecemento constante. Un detalle este, ao que axuda ser parte da prolongación do Camiño de Santiago cara a Fisterra e Muxía.
Concello de Carnota
Outro concello cun valor paisaxístico incalculable, a coñecida praia de Carnota, un areal de 7 quilómetros de lonxitude (o máis grande de España) e as Marismas de Caldebarcos son de obrigada visita. Nesta edición transitarase en dúas direccións por ese concello. Ao comezo da proba, gozando das vistas ao Faro Fisterra e ao océano Atlántico, e tamén buscando o final da etapa, bordeando o límite co concello de Mazaricos en dirección a Monte Pindo.
Concello de Outes
Outes é un lugar abrazado polo mar e pola montaña, onde cada recuncho nos ensina un espazo labrado por xeracións de labregos e mariñeiros ao longo dos séculos.
Dende os seus cumios temos as mellores perspectivas dos vales, ríos e do espazo costeiro que engalana todo o territorio do concello.
Concello de Muros
O concello máis meridional por onde discorre a proba. Duns 8.700 habitantes, é unha localidade de alta tradición pescadora e marisqueira.
