Se Galicia está atravesada de roteiros de peregrinación a Santiago polos catro costados, é cara á súa impresionante costa onde se dirixe a Fin do Camiño, os últimos pasos desas vías que construíron e vertebraron Europa a través dos séculos. Porque a peregrinaxe a Santiago non está completa sen chegar á ‘fin da terra’ e é esta fin a que queremos gozar sobre a bicicleta.

Escenario de naufraxios históricos, as xentes da Costa da Morte foron testemuñas da furia do mar durante séculos. A súa orientación xeográfica, aberta ao Atlántico, a súa accidentada conformación rochosa e a dureza do clima fixeron desta comarca un lugar lendario, no que contrastan o perigo do seu mar, infestado de naufraxios, coa sobrecoxedora beleza das súas paisaxes.